30-юми октябри соли ҷорӣ дар ҳошияи Рӯзи ҷаҳонии пасандоз, кормандони Бонки рушди Тоҷикистон бо таълимгирандагони Мактаби миёнаи №20 ба номи А. С. Пушкини шаҳри Душанбе дидору гуфтугӯ доштанд.

Зимни мулоқот кормандони бонк дониши худро дар мавриди аҳаммияту манфиати пасандоз, сарфаҷӯӣ ва истифодаи огоҳона аз манобеи молӣ бо муҳассилини ҷавон ба иштирок гузоштанд. Таъкид шуд, ки яке аз паёмҳои аслии Рӯзи ҷаҳонии пасандоз ғайр аз сарфаҷӯӣ, харҷи дурусту оқилонаи пул барои молу хадамоти босифат аст. Аз ин дидгоҳ, пасандоз барои бақои иқтисоди ҷаҳонӣ аҳаммияти фаровоне дошта, ҳар шахси пасандозкунанда дар ин бақо саҳмгузор мебошад.

Аз таърихи Рӯзи ҷаҳонии пасандоз

Таърихчаи Рӯзи ҷаҳонии пасандоз (World Savings Day) ба 31 октябри сол 1924 бармегардад. Дар охирин рӯзи баргузории аввалин Кунгураи байналмилалии бонкҳои пасандоз дар шаҳри Милани Италия, профессори итолёӣ Филиппо Равизза ин рӯзро ба унвони Рӯзи ҷаҳони пасандоз эълом ва муаррифӣ кард. Рӯзи ҷаҳони пасандоз ё рӯзи сарфаҷӯӣ барои иттилоърсонии ин мавзуъ ба мардуми саросари ҷаҳон эҷод шуд, ки пасандоз кардани пул дар бонк беҳтар аз нигаҳдоштан пул зери болиштҳо аст.